MIRADI YA SH. 18 BILIONI KUZINDULIWA MBIO ZA MWENGE, SHINYANGA

 

Na Mwandishi Wetu, Shinyanga.

Kishapu. Miradi 45 ya maendeleo yenye thamani ya Sh18 bilioni inatarajiwa kuzinduliwa katika Mkoa wa Shinyanga wakati wa mbio za Mwenge wa Uhuru mwaka 2026.

Miradi hiyo inatekelezwa katika wilaya za Kishapu, Shinyanga na Kahama, huku ikilenga kuboresha huduma na kuongeza fursa za maendeleo kwa wananchi.

Akizungumza leo, Agosti 18, 2026 wakati wa mapokezi ya Mwenge wa Uhuru katika kijiji cha Mwigumbi, kata ya Mondo Halmashauri ya Wilaya ya Kishapu, Mkuu wa Mkoa wa Shinyanga Mboni Mhita, amesema miradi hiyo itawanufaisha wananchi moja kwa moja.

“Kwa Mkoa wa Shinyanga wenye wilaya tatu, Mwenge wa Uhuru utakwenda kuzindua miradi 45 ambayo itagharimu Sh18 bilioni. Miradi hii itakwenda kunufaisha wananchi moja kwa moja,” amesema Mhita.

CRDB yawataka wananchi kuwa makini katika uwekezaji

Akizungumza kwa niaba ya Mtendaji Mkuu wa Benki ya Ushirika na Maendeleo Vijijini (CRDB), Mkurugenzi wa Mikopo wa benki hiyo, Exavery Makwi, amewataka wananchi kutulia na kufanya maamuzi sahihi kabla ya kuwekeza fedha zao katika biashara.

Makwi amesema baadhi ya wananchi wamekuwa wakigawanya fedha zao katika biashara nyingi bila kuwa na mpango mzuri, jambo ambalo linaweza kusababisha kushindwa kufuatilia matumizi na hatimaye kupoteza fedha.

“Wananchi tulizeni akili kabla ya kuwekeza katika biashara. Usije ukajikuta unawekeza pesa zako katika biashara nyingi, matokeo yake zinaishia pasipo kujulikana. Lakini ukituliza akili na pesa zako zikiwa benki, una nafasi ya kuwekeza katika biashara sahihi,” amesema.

Tawi la CRDB Maganzo lagharimu Sh700 milioni

Makwi amesema ujenzi wa jengo la tawi la CRDB Maganzo umegharimu Sh700 milioni na kwa sasa tawi hilo lina wafanyakazi wanane.

Amesema pamoja na huduma mbalimbali za kifedha, benki hiyo imeendelea kuboresha huduma zake kwa kutoa mikopo isiyo na riba pamoja na kuwezesha wananchi kupata vifaa vya kisasa vya kilimo.

“Ujenzi wa jengo la tawi hili la Maganzo umegharimu kiasi cha Sh700 milioni na kwa sasa tuna wafanyakazi wanane. Pamoja na huduma zote za kifedha tunazotoa, pia tumeboresha huduma kwa kutoa mikopo isiyo na riba,” amesema Makwi.

Ameongeza kuwa CRDB pia inakopesha vifaa vya kilimo cha kisasa, ikiwemo matrekta, plau na vifaa vingine vinavyoweza kuwawezesha wakulima kuongeza tija katika uzalishaji.

Mwang’ora aipongeza CRDB kwa mikopo

Kiongozi wa Mbio za Mwenge wa Uhuru Kitaifa, Wazo Michael Mwang’ora, amepongeza CRDB kwa kutoa mikopo kwa wananchi, hususan wafanyabiashara, pamoja na kuwawezesha wakulima kupata vifaa vya kisasa vya kilimo.

Mwang’ora amewataka wananchi wanaopata mikopo kuhakikisha wanaitumia kwa shughuli zenye tija ili waweze kurejesha kwa wakati.

“Unapochukua mkopo, nenda kafanye kazi na urejeshe kidogo kidogo. Nitoe pongezi kwa kutoa mikopo, mingine ikiwa isiyo na riba, sambamba na vifaa vya kilimo cha kisasa ambavyo vinawezesha wakulima kuwa na kilimo chenye tija,” amesema.

Serikali yapewa pongezi

Mwang’ora pia ameipongeza Serikali kwa kuweka mazingira yanayowawezesha wawekezaji kuwekeza nchini, akisema uwekezaji huo ni chachu ya maendeleo kwa wananchi.

“Tunatoa pongezi na shukrani kwa Serikali kwa kuwawezesha wawekezaji kuwekeza katika nchi yetu. Hii ni chachu ya maendeleo kwa wananchi,” amesema.

Picha